മനസ്സും പിശാചും

قُل لَّا يَعْلَمُ مَن فِي السَّمَاوَاتِ وَالْأَرْضِ الْغَيْبَ إِلَّا اللَّـهُ

(നബിയേ,) പറയുക; ആകാശങ്ങളിലും ഭൂമിയിലും ഉള്ളവരാരും അദൃശ്യകാര്യം അറിയുകയില്ല; അല്ലാഹുവല്ലാതെ. (27:65)

يَعْلَمُ خَائِنَةَ الْأَعْيُنِ وَمَا تُخْفِي الصُّدُورُ

കണ്ണുകളുടെ കള്ളനോട്ടവും, ഹൃദയങ്ങള്‍ മറച്ച് വെക്കുന്നതും അവന്‍ (അല്ലാഹു) അറിയുന്നു. (40:19)

നമ്മുടെ മനസ്സിലുള്ളത് നമുക്കല്ലാത്തവര്‍ക്ക് ഗൈബ് ആണ്,    മനുഷ്യരുടെ മനസ്സിലുള്ളത് ചുണ്ടുകളുടെ ചലനം മൂലമോ പ്രവാചകന്‍മാര്‍ക്ക് അല്ലാഹു അറിയിച്ചു കൊടുക്കുകയോ ചെയ്താലല്ലാതെ മലക്കിനൊ പിശാചിനോ അടക്കം മറ്റൊരു സൃഷ്ടിക്കും അറിയുക സാധ്യമല്ല. എന്നാല്‍ ഇയ്യടുത്ത കാലത്തായി ചിലയാളുകള്‍ തങ്ങളുടെ സ്ഥാപിത താല്‍പര്യങ്ങള്‍ സംരക്ഷിക്കുന്നതിനായി പലതും പറയുന്ന കൂട്ടത്തില്‍ പിശാചിന് മനസ്സിലെ ഗൈബ് അറിയാമെന്നു വാദിച്ചു തുടങ്ങിയിട്ടുണ്ട്. ഇത് അലീമുന്‍ ബി ദാതിസ്സുദൂര്‍, ആലിമുല്‍ ഗൈബ്, തുടങ്ങിയവ അല്ലാഹുവിന്‍റെ മാത്രം സിഫത്തുകളില്‍ പിശാചിനെ പങ്കു ചേര്‍ക്കല്‍ കൂടിയാണ്.

         എങ്കില്‍ നന്‍മ തിന്‍മകള്‍ രേഖപ്പെടുത്തുന്ന മലക്കുകള്‍ എങ്ങിനെയാണ് ഓരോ മനുഷ്യരുടെയും നന്‍മ തിന്‍മകള്‍ രേഖപ്പെടുത്തുന്നതും ഒരു നല്ല കാര്യം ചെയ്യാന്‍ ഉദ്ദേശിച്ചാല്‍ തന്നെ അത് പ്രവര്‍ത്തിച്ചില്ലെങ്കില്‍ പോലും അതിന്‍റെ പ്രതിഫലം രേഖപ്പെടുത്തുക എന്നും ചിന്തിക്കുന്നവരുണ്ടാകും. ബുഖാരിയും മുസ്ലിമും ഉദ്ധരിച്ച ഹദീസില്‍, അല്ലാഹു, ഒരാള്‍ ഒരു നന്‍മ ചെയ്യാന്‍ വിചാരിക്കുകയും എന്നാല്‍ അതനുസരിച്ച് പ്രവര്‍ത്തിക്കാന്‍ കഴിഞ്ഞില്ലെങ്കില്‍ പോലും അയാള്‍ക്ക്, ആ നല്ല നിയ്യത്തിനു പകരം ഒരു നന്‍മ രേഖപ്പെടുത്തുകയും, അതനുസരിച്ച് പ്രവര്‍ത്തിച്ചാല്‍ 10 മുതല്‍ 700 ഇരട്ടി വരെ നല്‍കുമെന്നും ഒരു തിന്‍മ ചെയ്യാന്‍ ഉദ്ദേശിക്കുകയും ശേഷം അതില്‍ നിന്ന് പിന്തിരിയുകയും ചെയ്‌താല്‍ ഒരു നന്‍മ മുഴുവനായി നല്‍കുകയും എന്നാല്‍ അതനുസരിച്ച് അവന്‍ ആ തിന്‍മ ചെയ്യുന്നതായാല്‍ അവന്‍റെ മേല്‍ ഒരു തിന്‍മ യായി അത് രേഖപ്പെടുത്തുകയും ചെയ്യും എന്ന് പറയുന്നു. അപ്പോള്‍ ഈ മനുഷ്യന്‍ ചെയ്യാന്‍ വിചാരിക്കുന്ന നന്‍മയും തിന്‍മയും മലക്കുകള്‍ അറിഞ്ഞാലല്ലേ അതിനെ കുറിച്ച് പ്രതിഫലം രേഖപ്പെടുത്താന്‍ കഴിയൂ, അപ്പോള്‍ മലക്കുകള്‍ മനുഷ്യന്‍റെ മനസ്സിലെ ഗൈബ് അറിയുമോ എന്ന് ചിലര്‍ ചോദിക്കാറുണ്ട്.

روى البخاري (6491) ومسلم (131) عَنْ ابْنِ عَبَّاسٍ رَضِيَ اللَّهُ عَنْهُمَا عَنْ النَّبِيِّ صَلَّى اللَّهُ عَلَيْهِ وَسَلَّمَ ، فِيمَا يَرْوِي عَنْ رَبِّهِ عَزَّ وَجَلَّ قَالَ : ( إِنَّ اللَّهَ كَتَبَ الْحَسَنَاتِ وَالسَّيِّئَاتِ ثُمَّ بَيَّنَ ذَلِكَ فَمَنْ هَمَّ بِحَسَنَةٍ فَلَمْ يَعْمَلْهَا كَتَبَهَا اللَّهُ لَهُ عِنْدَهُ حَسَنَةً كَامِلَةً فَإِنْ هُوَ هَمَّ بِهَا فَعَمِلَهَا كَتَبَهَا اللَّهُ لَهُ عِنْدَهُ عَشْرَ حَسَنَاتٍ إِلَى سَبْعِ مِائَةِ ضِعْفٍ إِلَى أَضْعَافٍ كَثِيرَةٍ وَمَنْ هَمَّ بِسَيِّئَةٍ فَلَمْ يَعْمَلْهَا كَتَبَهَا اللَّهُ لَهُ عِنْدَهُ حَسَنَةً كَامِلَةً فَإِنْ هُوَ هَمَّ بِهَا فَعَمِلَهَا كَتَبَهَا اللَّهُ لَهُ سَيِّئَةً وَاحِدَةً ) .

ഇബ്നു ഹജര്‍ (റ ) ഫതഹുല്‍ ബാരിയില്‍, ഈ ഹദീസ് വിവരിച്ചു കൊണ്ട് ഒന്നാമത്തെ പ്രബലമായ അഭിപ്രായമായി പറയുന്നത് അബീ ഉമ്രാനുല്‍ ജൂനിയില്‍ നിന്ന് ബിന്‍ അബീ അദ്ദുനിയ പറയുന്നു ''അല്ലാഹു മലക്കുകളോട് ഇന്നയാള്‍ക്ക് വേണ്ടി ഇന്നകാര്യത്തിനു ഇങ്ങനെ അജ്ര് എഴുതാന്‍ പറയും, അപ്പോള്‍ മലക്കുകള്‍ ചോദിക്കും, യാ റബ്ബ്, അവന്‍  അങ്ങിനെ ഒന്നും പ്രവര്ത്തിചിട്ടില്ലല്ലോ ?, അപ്പോള്‍ അല്ലാഹു പറയും അവന്‍ മനസ്സില് അത് ചെയ്യാന്‍ കരുതിയിരുന്നു എന്ന്.

(عن أبي عمران الجوني ، قال : ينادى الملك اكتب لفلان كذا وكذا ، فيقول يا رب : إنه لم يعمله ، فيقول : إنه نواه . )  

ഇതില്‍ നിന്ന് മനസ്സിലാകുന്നത്‌ നന്‍മ തിന്‍മകള്‍ രേഖപ്പെടുത്തുന്ന മലക്കുകള്‍ക്ക് പോലും മനുഷ്യന്‍ മനസ്സില്‍ ചെയ്യാന്‍ ഉദ്ദേശിച്ചത് അറിയില്ല, അല്ലാഹു വെളിപ്പെടുത്തിയാലല്ലാതെ എന്നാണു.

മറ്റൊരു അഭിപ്രായമായി പറയപ്പെടുന്നു എന്ന് പറഞ്ഞു വീണ്ടും കൊടുക്കുന്നത് ''എന്നാല്‍ തിന്മയായ വിചാരങ്ങള്‍ ചീത്ത ഗന്ധമായും മായും നല്ല വിചാരങ്ങള്‍ സുഗന്ധമായും മനസ്സില് നിന്ന് പുറപ്പെടുകയും അത് മലക്കുകളിലെത്തുകയും ചെയ്യുമെന്നു അബീ മഎശര്‍ അല്‍ മദനിയില്‍ നിന്ന് ത്വബരിയും അത് പോലെ സുഫ് യാനു ബിനു ഉയയ്നയില്‍ നിന്നും വന്നിട്ടുണ്ട് എന്നാണു. ഇപ്രകാരം ഒരു ചീത്ത കാര്യം ചെയ്യാന്‍ മനസ്സില്‍ വിചാരിക്കുമ്പോള്‍ ഉണ്ടാകുന്ന ഗന്ധം പിശാചു തിരിച്ചറിഞ്ഞു അതിലേക്ക് അവനെ പ്രേരിപ്പിക്കുകയും അത് ഭംഗിയാക്കാന്‍ ന്യായീകരണങ്ങള്‍ നിരത്തുകയും ചെയ്യും.

 ശൈഖുല്‍ ഇസ്ലാമിനോട് ഇതേ പറ്റി ചോദിക്കപ്പെട്ടപ്പോള്‍ മുകളിലെ സുഫിയാനു ബിനു ഉയയ്ന യുടെ വാക്കുകള്‍ കൊടുത്ത ശേഷം അല്ലാഹു തന്‍റെ അടിമയുടെ മനസ്സിലുള്ളത് അവനുദ്ധേശിച്ച പോലെ മലക്കുകളെ അറിയിക്കാന്‍ കഴിവുള്ളവനാണ്‌ എന്നാണു പറയുന്നത് (മജ്മൂഅ അല്‍ഫതാവ). എന്തായാലും മനുഷ്യന്‍റെ മനസ്സിലെ അവന്‍ വാക്കായോ മറ്റോ മറ്റാരോടും പറയാത്ത രഹസ്യങ്ങള്‍ അല്ലാഹു അല്ലാതെ ഒരു സൃഷ്ടിക്കും അറിയാമെന്നതിനു ഒരു പ്രമാണവും ശരിയായി വന്നിട്ടില്ല.

എന്നാല്‍ ഓരോ മനുഷ്യനോടോപ്പവും നന്‍മകള്‍ ഉപദേശിച്ചു കൊണ്ട് മലക്കില്‍ പെട്ട ഒരു കൂട്ടുകാരനും (കരീന്‍ ) തിന്‍മകള്‍ ചെയ്യാന്‍ പ്രേരിപ്പിച്ചു കൊണ്ട് ജിന്ന് വര്‍ഗത്തിലെ പിശാചില്‍ പെട്ട ഒരു കൂട്ടുകാരനും മരണം വരെ വേര്‍പിരിയാതെ ഉണ്ടാകുമെന്ന് സ്വഹീഹായ ഹദീസുകളില്‍ വന്നതാണ്.

മനുഷ്യന്‍റെ മനസ്സ് എന്നത് പ്രകൃത്യാ തന്നെ നിരന്തരം തിന്മ കൊണ്ട് കല്‍പിച്ചു കൊണ്ടേയിരിക്കുന്നു എന്ന് ഖുര്‍ആനില്‍ നിന്നും ഹദീസുകളില്‍ നിന്നും മനസ്സിലാക്കാം...

إِنَّ النَّفْسَ لَأَمَّارَةٌ بِالسُّوءِ إِلَّا مَا رَحِمَ رَبِّ

തീര്‍ച്ചയായും മനസ്സ് ദുഷ്പ്രവൃത്തിക്ക് പ്രേരിപ്പിക്കുന്നത് തന്നെയാകുന്നു. എന്‍റെ രക്ഷിതാവിന്‍റെ കരുണ ലഭിച്ച മനസ്സൊഴികെ. (12:53) കൂടാതെ ഹദീസില്‍ വന്ന പ്രവാചകന്‍ കല്‍പിച്ച ദുആയിലും പിശാചിനെ കൂടാതെ മനസ്സിന്റെ ശര്റില്‍ നിന്ന് അല്ലാഹുവോട് കാവല്‍ ചോദിക്കുന്നത് കാണാം...

اللَّهُمَّ عَالِمَ الْغَيْبِ وَالشَّهَادَةِ، فَاطِرَ السَّمَوَاتِ وَالأَرْضِ، رَبَّ كُلِّ شَيْءٍ وَمَلِيكَهُ، أَشْهَدُ أَنْ لاَ إِلَهَ إِلأَّ أَنْتَ، أَعُوذُ بِكَ مِنْ شَرِّ نَفْسِي، وَمِنْ شَرِّ الشَّيْطَانِ وَشِرْكِهِ، وَأَنْ أقْتَرِفَ عَلَى نَفْسِي سُوءًا، أَوْ أَجُرَّهُ إِلَى مُسْلِمْ،

ആരെങ്കിലും ആരാധനയിലും പുണ്യ പ്രവര്‍ത്തികളിലും മുഴുകി കൊണ്ടും നിഷിദ്ധങ്ങള്‍ക്ക് നേരെ ക്ഷമ പാലിച്ചു കൊണ്ടും അല്ലാഹുവിന്‍റെ കല്‍പനകള്‍ മുറുകെ പിടിക്കുന്നുവോ, അത്തരം മനസ്സുകള്‍ 'ഖല്‍ബുന്‍ മുതുമഇന്ന്', അഥവാ, സമാധാനമടഞ്ഞ മനസിന്‍റെ ഉടമകളാവുന്നു. അവര്‍ക്ക് അല്ലാഹുവിങ്കല്‍ ഉന്നത പ്രതിഫലവുമുണ്ട്‌. എന്നാല്‍ ഇടയ്ക്കിടയ്ക്ക് ദെഹേച്ചക്ക് വഴങ്ങിയും പിശാചിന്‍റെ പ്രേരണ മൂലവും തെറ്റ് ചെയ്യുന്നവര്‍, അവര്‍ സത്യവിശ്വാസികള്‍ ആണെങ്കില്‍ ചെയ്ത തെറ്റില്‍ പശ്ചാത്തപിക്കുകയും തെറ്റിലേക്ക് നീങ്ങിയ മനസ്സിനെ സ്വയം  ആക്ഷേപിക്കുകയും ചെയ്യും. ഇതാണ് നഫ്സുല്‍ ലവ്വാമ എന്ന് അല്ലാഹു വിശേഷിപ്പിച്ച, ആക്ഷേപിക്കുന്ന മനസ്സ്. എന്നാല്‍ തെറ്റുകളില്‍ ആണ്ടു പോയി ഒരു വീണ്ടു വിചാരവും നടത്താത്ത കടുത്തു പോയ മനസ്സുകളെ 'ഖല്‍ബുന്‍ മയ്യിത്ത് എന്ന് പറയുന്നു. അല്ലാഹു അത്തരം മനസ്സുകളില്‍ നിന്ന് കാത്തു രക്ഷിക്കട്ടെ.

       ചുരുക്കത്തില്‍ മനുഷ്യനെ തെറ്റിലേക്ക് പ്രേരിപ്പിക്കുന്നതും എപ്പോഴും കൂടെയുള്ള പിശാചില്‍ പെട്ട കരീനും മനസ്സുമാണ്. ഇവിടെ മനസ്സിലാക്കേണ്ടത് എല്ലാ മനുഷ്യന്‍റെയും മനസ്സു, ഒരേ സമയം നല്ലതും ചീത്തയും ആവ്ശ്യപ്പെട്ടുന കൊണ്ടേയിരിക്കും മനുഷ്യന്‍റെ പ്രകൃത്യായുള്ള ആഗ്രഹങ്ങള്‍ക്കും ശീലങ്ങള്‍ക്കും അനുസരിച്ച് സഞ്ചരിക്കുന്ന പ്രകൃതിയിലാണ് മനസ്സിന്‍റെ സൃഷ്ടിപ്പ്. ചെറു പ്രായം തൊട്ടു ഒരാള്‍ വളരുന്ന സാഹചര്യവും കൂട്ടുകെട്ടും അവന്‍റെ ഇത്തരം ശീലങ്ങളെ സ്വാദീനിച്ചു തുടങ്ങും. തിരിച്ചറിവിന്‍റെ പ്രായമെത്തുന്നതോടെ, തെറ്റുകള്‍ ചെയ്യുമ്പോള്‍, അതിനെ കുറിച്ച് മനസ്സ് ചിന്തിച്ചു തുടങ്ങുമ്പോള്‍, ആദ്യമാദ്യം ശക്തിയായി തന്നെ അതിനെതിരായുള്ള ചിന്തകളും മനസ്സില്‍ ഉണ്ടാകും.  അത്തരം തെറ്റായ ചിന്തകള്‍ക്ക് കടിഞ്ഞാണിടുകയും അങ്ങിനെ മനസ്സിന്‍റെ പ്രകൃത്യാ ഉള്ള സ്വാധീന വലയത്തില്‍ നിന്ന് പുറത്തു കടക്കുകയും ചെയ്യുന്നവരെ കുറിച്ചാണ്  ഇച്ചാശക്തിയുള്ളവര്‍ 'വില്‍ പവര്‍' ഉള്ളവര്‍ എന്നൊക്കെ പറയുന്നത്. ഇത് ഒരാളുടെ മനസ്സിന്‍റെ വികാരത്തിന്‍റെ മേല്‍ അയാളുടെ മനസ്സിന്‍റെ വിവേകം നിയന്ത്രണം നേടുന്ന അവസ്ഥയാണ്. ഇത് മുസ്ലിംകളിലും അല്ലാത്തവരിലും ഉള്ളത് കൊണ്ടാണ് അമുസ്ലിംകളിലും തെറ്റുകളില്‍ ആണ്ടു പോകാത്തവരെയും തെറ്റുകളില്‍ നിന്ന് പിന്‍മാറുന്നവരെയും കാണുവാന്‍ കഴിയുന്നത്‌. എന്നാല്‍ ഇത്തരം തെറ്റുകള്‍ ശീലമാക്കിയ ആളുകളെ തന്നോടൊപ്പമുള്ള കരീന്‍ ആ തെറ്റുകളെ മുഴുവന്‍ അലങ്കാരമാക്കിയും നിസ്സാരമാക്കിയും തോന്നിപ്പിക്കുകയും അവനെ അതില്‍ തന്നെ തളച്ചിടാന്‍ ശ്രമിച്ചു കൊണ്ടേയിരിക്കുകയും ചെയ്യും.

       പിശാചിനു  മനുഷ്യന്‍റെ മനസ്സിലുള്ള രഹസ്യങ്ങള്‍  അറിയുക സാധ്യമല്ല, പിശാചു നമ്മുടെ മനസ്സില്‍ കരുതിയ ഏതെങ്കിലും നന്‍മകളെ തടയുന്നതോ, ചെയ്യാന്‍ വിചാരിക്കുന്ന തെറ്റിനെ ഭംഗിയാക്കുന്നതോ മനസ്സിലെ ആരോടും വെളിപ്പെടുത്താത്ത രഹസ്യം പിശാചു അറിഞ്ഞിട്ടല്ല, അങ്ങിനെ സൂചന നല്‍കുന്ന ഒരു പ്രമാണവും ഇല്ല തന്നെ. മറിച്ചു, പിശാചു മനുഷ്യന്‍റെ, തിന്‍മയിലേക്ക് പ്രേരിപ്പിച്ചു കൊണ്ടീയിരിക്കുന്ന   സന്തത സഹചാരിയാണ് എന്നത് കൊണ്ട് തന്നെ, അവന്നു ആകെ ചെയ്യാനുള്ളത് എപ്പോഴും ഇയാളെ തെറ്റിലേക്ക് ക്ഷണിച്ചു കൊണ്ടേയിരിക്കുക എന്നത് മാത്രമാണ്.  ഒരാളുടെ കൂടെ ജനനം മുതല്‍ അയാളോടൊപ്പമുള്ള ജിന്നില്‍ പെട്ട കരീനിനു, മറ്റാരേക്കാളും നന്നായി അയാളുടെ പ്രവര്‍ത്തികളും ദേഹേച്ചകളും അറിയാന്‍ കഴിയുന്നു. അത് കൊണ്ട് ഓരോ വ്യെക്തിക്കുമനുസരിച്ചു അവരവര്‍ക്ക് താല്‍പര്യം ഏറെയുള്ള നിഷിദ്ധങ്ങളിലേക്ക് അവരെ പ്രേരിപ്പിക്കുകയും ആ തിന്‍മയെ ഭംഗിയാക്കി തോന്നിക്കുകയും ചെയ്യുക എന്നത് അവന്‍ ഒരിക്കലും ഉപേക്ഷിക്കാത്ത പ്രവര്‍ത്തിയാണ്.

വിശ്വാസിയായ  ഒരാള്‍ പ്രഭാതം മുതല്‍ പ്രദോഷം വരെ സാധാരണ എന്തൊക്കെ ചെയ്യുമെന്ന് ഈ കരീന്‍ മനസ്സിലാക്കുന്നു. ബാങ്ക് കേട്ടാല്‍ പള്ളിയില്‍ പോകുമെന്നും, വാഹനത്തിലോ വീട്ടിലോ മത പ്രഭാഷണം കേള്‍ക്കുമെന്നും, ഖുര്‍ആന്‍ പഠിക്കും ഹദീസ് പഠിക്കും തുടങ്ങി ഒഴിവു സമയങ്ങള്‍ എങ്ങിനെ വിനിയോഗിക്കുന്നു എന്ന് തുടങ്ങി ഇയാളുടെ ദൌര്‍ബല്യങ്ങള്‍ എന്തൊക്കെയാണ് എന്നുവരെ എല്ലാ കാര്യങ്ങളും കാലങ്ങളായി ഒപ്പമുള്ള  ഈ കരീന്‍  അറിയാവുന്നത് കൊണ്ട് തന്നെ, ഇയാളുടെ ദൌര്‍ബല്യങ്ങള്‍ മനസ്സിലാക്കി അതിലൂടെ തെറ്റുകളിലേക്ക് പ്രേരണ നല്‍കും. എന്നാല്‍ പിശാചിന്‍റെ ഈ കുതന്ത്രം മനസ്സിലാക്കി, അല്ലാഹുവില്‍ ശരണം തേടുന്നതോടെ പിശാചു ആ ഉദ്യമത്തില്‍ നിന്ന് പിന്തിരിഞ്ഞു, അടുത്ത അവസരം കാത്തിരിക്കും.

           സുബ്ഹി ബാങ്ക് കേട്ട് ഉറക്കത്തില്‍ നിന്ന് ഉണരാന്‍ ശ്രമിക്കുമ്പോള്‍ കുറച്ചു കൂടി ഉറങ്ങാം എന്ന് തോന്നിപ്പിക്കുന്നതും, ഫൈസ് ബുക്കില്‍ ഇരിക്കെ ബാങ്ക് കേള്‍ക്കുമ്പോള്‍ കുറച്ചു കൂടി ഇരുന്നു മറുപടി കൊടുക്കാം, ദഅവത്തല്ലേ എന്നൊക്കെ തോന്നിച്ചു പിന്തിരിപ്പിക്കാന്‍ ശ്രമിക്കുന്നതും, ഏതെങ്കിലും ദീനീ സംരംഭത്തിന് സഹായം ചോദിച്ചു ആരെങ്കിലും വരുമ്പോഴോ അത്തരം ആഹ്വാനം ഉണ്ടാകുമ്പോഴോ, മറ്റു അത്യാവശ്യവും അനാവശ്യവുമായ ചിലവുകളെ കുറിച്ചും, വരുമാനക്കുറവിനെ കുറിച്ചും ഓര്‍മപ്പെടുത്തി പിന്തിര്‍പ്പിക്കാന്‍ ശ്രമിക്കുന്നതും, ഈണമുള്ള പാട്ട് കേള്‍ക്കുമ്പോള്‍ അതിനു മാധുര്യം തോന്നിക്കുന്നതുമെല്ലാം ഇവന്‍റെ തന്ത്രങ്ങളില്‍ പെട്ടതാണ്. ആളുകളുടെ സ്വഭാവത്തിനനുസരിച്ച് പിശാചു തന്‍റെ സൂത്രങ്ങളിലും വെത്യാസം വരുത്തിയാണ് ദുര്‍ബോധനം നടത്തുക. ധര്‍മ്മിഷ്ടനായ ഒരാളോട് പിശാചു ഇപ്പോഴും ചെയ്യുന്ന ദുര്‍ബോധനം ധര്‍മ്മം ചെയ്യുന്നത് തടയുന്നതിന് പറ്റിയ നിലക്കായിരിക്കും.

  അല്ലാഹു പറഞ്ഞല്ലോ പിശാചു ദാരിദ്ര്യത്തെക്കുറിച്ച് നിങ്ങളെ  പേടിപ്പിക്കുമെന്ന്..

(2:268) الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ

എന്നാല്‍ സ്വതവേ പിശുക്കനായ ഒരാളോട് ആ വിഷയത്തിലാവില്ല പിശാചിന്‍റെ പ്രധാന ദുര്‍ബോധനം. ശിര്‍ക്ക് ചെയ്യുന്ന ഒരാളോട് ആ ചെയ്യുന്നത് ഭംഗിയാക്കി തോന്നിക്കുന്നതും, കള്ളുകുടിയനും സംഗീതം ഇഷ്ടപ്പെടുന്നവനും അതിനെ ഒക്കെ സാമന്യവല്‍ക്കരിച്ചും ന്യായീകരണങ്ങള്‍ നിരത്തി അതില്‍ ഉറപ്പിച്ചു നിര്‍ത്താനും പിശാചു പ്രേരിപ്പിക്കും..

            എല്ലാം എല്ലാം ഈ അക്രമിയായ സൂത്രക്കാരന്‍റെ കെണികള്‍ തന്നെ.   സ്വാതികനായ ഒരാളെ വ്യെഭിചാരത്തിലേക്ക് എത്തിക്കാന്‍ തുടക്കം തന്നെ പെണ്ണിനെ കുറിച്ച് മോഹം തോന്നിപ്പിക്കുകയല്ല, മറിച്ചു അവളുമായി ഒറ്റക്കാകാനുള്ള എന്തെങ്കിലും സൂത്രപ്പണിയാകും അവന്‍ ആദ്യം തോന്നിക്കുക. എന്നിട്ട് ക്രമേണ വ്യെഭിചാരത്തില്‍ എത്തിക്കുക എന്നതാകും പിശാചിന്‍റെ സൂത്രം. അത് കൊണ്ടാണ് പ്രായ പൂര്‍ത്തിയായ ഒരു പുരുഷനും സ്ത്രീയും ഒറ്റക്കാകുന്നത് ഇസ്ലാം വിലക്കിയത്. ഇമാം ഇബ്ന്‍ ഹജര്‍ (റ)  ഉദ്ദരിച്ച സ്വാതികനായ ഒരാള്‍ ശിര്‍ക്ക് ചെയ്തു മരിക്കാന്‍ ഇടയായ സംഭവം തുടങ്ങിയത്, സഹോദരന്‍മാര്‍ ദൂരേക്ക്‌ പോകുന്ന അവസരത്തില്‍ ശ്രദ്ധിക്കാന്‍ ഏല്‍പിച്ച അയല്‍പക്കത്തെ ഒറ്റക്കായ പെണ്ണിനെ വീട്ടിലേക്കു ക്ഷണിച്ചു അവള്‍ക്ക് ഉപകാരം ചെയ്യാന്‍ തോന്നിച്ചു കൊണ്ടുള്ള രീതിയിലായിരുന്നു എന്നത് ശ്രദ്ധേയമാണ്. അത്തരം കെണിയില്‍ നിന്ന് മുക്തമാകാന്‍ എപ്പോഴും അല്ലാഹുവേ കുറിച്ചുള്ള സ്മരണകളും അല്ലാഹുവും പ്രവാചകനും അറിയിച്ചു തന്ന മുന്നൊരുക്കങ്ങളും മാത്രമേ വഴിയായുള്ളൂ. 

അല്ലാഹു പറയുന്നത് കാണുക..:

وَإِمَّا يَنزَغَنَّكَ مِنَ الشَّيْطَانِ نَزْغٌ فَاسْتَعِذْ بِاللَّـهِ ۚ إِنَّهُ سَمِيعٌ عَلِيمٌ ﴿٢٠٠﴾ إِنَّ الَّذِينَ اتَّقَوْا إِذَا مَسَّهُمْ طَائِفٌ مِّنَ الشَّيْطَانِ تَذَكَّرُوا فَإِذَا هُم مُّبْصِرُونَ ﴿٢٠١﴾

( പിശാചില്‍ നിന്നുള്ള വല്ല ദുഷ്പ്രേരണയും നിന്നെ ബാധിക്കുകയാണെങ്കില്‍ നീ അല്ലാഹുവോട് ശരണം തേടിക്കൊള്ളുക. തീര്‍ച്ചയായും അവന്‍ എല്ലാം കേള്‍ക്കുന്നവനും അറിയുന്നവനുമാണ്‌.

തീര്‍ച്ചയായും സൂക്ഷ്മത പാലിക്കുന്നവരെ പിശാചില്‍ നിന്നുള്ള വല്ല ദുര്‍ബോധനവും ബാധിച്ചാല്‍ അവര്‍ക്ക് (അല്ലാഹുവെപ്പറ്റി) ഓര്‍മവരുന്നതാണ്‌. അപ്പോഴതാ അവര്‍ ഉള്‍കാഴ്ചയുള്ളവരാകുന്നു.: അഎറാഫ് 200- 201) ഈ ശരണം തേടല്‍ 'അഊദ് ബില്ലാഹി മിനശ്ശൈത്താനി റജീം' എന്ന് പറയലാകുന്നു എന്ന് നബി വചനത്തില്‍ കാണാം. നിസ്കാരത്തില്‍ ആയാല്‍ പോലും ഇത് സ്വയം കേള്‍ക്കുന്ന ശബ്ദത്തില്‍ ചൊല്ലുകയും ഇടതു വശം തിരിഞ്ഞു മൂന്നു വട്ടം പാറ്റി തുപ്പുകയും ചെയ്യണം എന്ന് സ്വഹീഹായി ഹദീസുകളില്‍ കാണാം. ഇത് പിശാചിനോടുള്ള വെറുപ്പു പ്രകടിപ്പിക്കലാണ്. കേവലം മനസ്സില്‍ സ്മരിക്കുക എന്നത് കൊണ്ട് പിശാചു പോകുമായിരുന്നെങ്കില്‍ ഇവ്വിദം കല്‍പിക്കുമായിരുന്നില്ല. മാത്രമല്ല, ഇങ്ങനെ മനസ്സിലുള്ളത് പിശാചിന് അറിയാമായിരുന്നെങ്കില്‍ മനസ്സില്‍ കരുതിയാല്‍ മതി എന്ന് അല്ലാഹുവും പ്രവാചകനും ഇസ്തി ആദയെക്കുറിച്ച് പറഞ്ഞു തരികയും ചെയ്തേനെ....

               അല്ലാഹുവേ സ്മരിക്കുന്ന മനസ്സില്‍ ഒരു കാരണവശാലും പിശാചിന് കയറാന്‍ കഴിയില്ല. സ്വാഭാവികമായും ഒരാള്‍ അല്ലാഹുവേ കുറിച്ച് ഓര്‍ക്കുമ്പോള്‍ പിശാചു ദുര്‍ബോധനം നിര്‍ത്തി പോകേണ്ടി വരും. മാത്രമല്ല, ഇസ്ലാമില്‍ അല്ലാഹുവേ സ്മരിക്കുക എന്നത്  കൊണ്ടുദ്ധേശം അല്ലാഹുവേ ഓര്‍ത്തു ധ്യാനത്തില്‍ ഇരിക്കുക എന്നതല്ല, അങ്ങിനെ പ്രവാചക ചര്യയിലോ സ്വഹാബാക്കളുടെ പ്രവര്‍ത്തി കളിലോ കാണാന്‍ കഴിയില്ല. എന്നാല്‍ ദൈവ സ്മരണ നില നിര്‍ത്തുന്ന  ഇസ്ലാമിക രീതി,  ഒരാള്‍ ദിക്റുകളും നിസ്കാരങ്ങളും വര്‍ദ്ധിപ്പിക്കുകയും ഖുര്‍ആന്‍ പാരായണത്തിലും മറ്റു പുണ്യ കര്‍മങ്ങളില്‍ ഒന്നിന് പിറകെ ഒന്നിലായി കൊണ്ട് ഉണര്‍ന്നിരിക്കുന്ന സമയങ്ങളില്‍ ഒക്കെയും പിശാചിന് ഇടമില്ലാത്ത വിധം തിരക്കിലായിരിക്കും. ഇനി കുടുംബത്തോടും സുഹൃത്തുകളോടും സല്ലപിക്കുന്ന സദസ്സുകള്‍ ആണെങ്കില്‍ പോലും അവിടെ അല്ലാഹുവേ സ്മരിക്കുന്ന കാര്യങ്ങള്‍ ഇടയ്ക്കു ഉണ്ടാകുകയും ചെയ്യും, അങ്ങിനെയാകണം എന്നാ പ്രവാചക കല്‍പന ഇത്തരുണത്തില്‍ ശ്രദ്ധേയമാണ്.

 മുസ്ലിം റിപ്പോര്‍ട്ട് ചെയ്ത ഒരു ഹദീസില്‍ ഒരാള്‍ തന്‍റെ വീട്ടിലേക്കു പ്രവേശിക്കുമ്പോഴും ഭക്ഷണം കഴിക്കുമ്പോഴും അല്ലാഹുവേ സ്മരിച്ചാല്‍ പിശാചു ഇന്നേ ദിവസം ഈ വീട്ടില്‍ താവളമോ ഇവിടെ നിന്ന് ഭക്ഷണമോ ഇല്ല എന്ന് പറഞ്ഞു പോകും എന്ന് പ്രവാചകന്‍ പറഞ്ഞതായി വന്നിട്ടുണ്ട്. ഇവിടെ ഒരാള്‍ ബിസ്മില്ലാഹ് എന്ന് പറയുന്നത് കേള്‍ക്കുന്നതിലൂടെയാണ് പിശാചു അല്ലാഹുവേ സ്മരിച്ചു എന്നതറിയുന്നത്‌.  ചുരുക്കത്തില്‍ പിശാചിനെ അനങ്ങാന്‍ കഴിയാത്ത വിധം അകറ്റി നിര്‍ത്തി കൊണ്ടായിരിക്കും ഒരു യഥാര്‍ത്ഥ വിശ്വാസിയുടെ ജീവിതത്തിന്‍റെ നിഖില മേഖലകളിലെയും ദിനചര്യകള്‍ മുഴുവന്‍ എന്നര്‍ത്ഥം. ആരാധനാ കര്‍മങ്ങളില്‍ അല്ലാത്ത, നമ്മള്‍ സാധാരണയായി ചെന്നെത്തുന്നിടത്തോക്കെ പിശാചില്‍ നിന്ന് കാവല്‍ ചോദിച്ചു കൊണ്ടുള്ള വിവിധ പ്രാര്‍ത്ഥ നകള്‍ പഠിപ്പിച്ചതും ഈയൊരു ലക്ഷ്യത്തില്‍ തന്നെയാണെന്ന് മനസ്സിലാക്കാം. മാത്രമല്ല, മനസ്സിലെ രഹസ്യങ്ങള്‍ അറിയുന്നവന്‍ അല്ലാഹു മാത്രമാണ് എന്നും അര്‍ത്ഥ ശങ്കക്കിടയില്ലാത്ത വിധം വ്യെക്തമാകുന്നു.

അത് കൊണ്ട് തന്നെ പിശാചിനെ കുറിച്ച് അല്ലാഹു നല്‍കിയ മുന്നറിയിപ്പുകള്‍ ഗൌരവത്തില്‍ എടുക്കുകയും പിശാചിനെ നിന്ദ്യനും നമ്മുടെ ആജന്മശത്രുവുമാണ് എന്ന് തിരിച്ചറിയുകയും, അവന്‍റെ കെണികളെ പേടിക്കുകയും അതില്‍ നിന്ന് അല്ലാഹുവിനോട് സദാ കാവല്‍ തേടുകയും ചെയ്യുന്നതിന് പകരം, അവന്‍റെ കെണികള്‍ നിസ്സാരവല്‍കരിച്ചും, അവനില്ലാത്ത, മനസ്സിലെ ഗൈബ് അറിയാമെന്നും അഭൌതിക കഴിവിന്‍റെ ഉടമയാണ് എന്നും പറഞ്ഞു അവന്‍റെ ഗര്‍വ് വര്‍ദ്ധിപ്പിക്കുന്ന പ്രവത്തികളില്‍ നിന്ന് മുസ്ലിംകള്‍ വിട്ടു നില്‍ക്കണം എന്നാണു ഓര്‍മിപ്പിക്കാനുള്ളത്. 

അല്ലാഹു തൌഹീദിന്‍റെയും സുന്നത്തിന്‍റെയും വ്യാപനത്തെ തടയുന്ന, മനസ്സുകള്‍ ഭിന്നിപ്പിക്കുന്ന എല്ലാ പിശാചുക്കളില്‍ നിന്നും അവന്‍റെ സഹായികളില്‍ നിന്നും നമ്മെ രക്ഷിക്കട്ടെ....